«2 адам жоқ»: Құтқарушылар Ертіске құлаған көлікті алып шықты

5 қаңтар Ертіс өзеніне көлік түсіп кеткен болатын. Қазіргі уақытта оқиға орнында екі адамды іздестіру жұмыстары жүріп жатыр. Бүгін құтқарушылар көлікті алып шықты, деп хабарлайды Orda.kz.

5 қаңтар күні Ертіс өзенінің Полковничий аралы аумағында (Бүркіт ұясы маңында) автокөлік жардан құлап, суға батып кеткен. Оқиға болған сәтте көліктің ішінде төрт адам болған.

Жолаушылардың бірі көліктен шығып, өз бетінше жағаға жүзіп шыққан. Кейінірек, таңғы сағат 9-да құтқарушылар өзен ағысынан 11 шақырым төмен жерде бір қыздың денесін тапты.

Апат кезінде көлікте болған тағы екі адамның тағдыры әлі белгісіз. Төтенше жағдайлар министрлігінің мәліметіне қарасақ, құтқарушылар 68303 әскери бөлімнің инженерлік техникасын пайдаланып, суға батқан автокөлікті Ертістен шығарған. Ведомствоның 100-ден астам қызметкері жолаушыларды іздеп жатыр.

Бұған дейін біз жарысқан автокөліктің бірі Ертіс өзеніне түсіп кеткені туралы жазған едік.