17 жыл құлдықта болған Құндыздың тағы азапталғаны белгілі болды

Әлеуметтік желіде жарияланған суретте еденде жатқан қыздың қол-аяғын байлап, аузын скотчпен жапқан жетімнің қамқоршысына қатысты қылмыстық іс қозғалды, деп хабарлайды Orda.kz.

Желіде резонанс тудырған жағдайға байланысты оқиға орнына барған журналист  Руслан Өтепбай мән-жайды жәбірленушінің өзінен анықтаған. Құндыздың айтуынша, ол қол-аяғы байлаулы күйде жатқан сәтте оның қамқоршысы Зулфия Төленова үйде болған. Ал Зулфия Төленова бұл мәлімдемені жоққа шығарып, сол кезде үйде болмағанын және мұндай жағдайдан бейхабар екенін айтты. Руслан Өтепбай жәбірленушінің сөзін жоққа шығаратын негіз көрмей тұрғанын айтты.

Аталған дерекке қатысты құқық қорғау органдары Қылмыстық кодекстің 110-бабы — «Азаптау» бойынша сотқа дейінгі тергеп-тексеру жұмыстарын бастады.  Балалар құқықтары жөніндегі уәкіл Динара Закиева жәбірленуші қазіргі уақытта қауіпсіз жерде екенін және оған қажетті көмек көрсетіліп жатқанын мәлімдеді.

Еске сала кетейік,Талдықорғандағы Айзат Жұманованың өліміне қатысты резонансты істің нүктесі қойылып, сот айыпталушыны 14 жылға соттағанымен марқұмның жақындары бұл шешіммен келіспей, президентке үндеу жолдады.