Ұлытауда ер адамды әжетханада азаптаған полицейлер жазаланды

Жаңаарқа ауданының тұрғыны өзін үш полицей азаптағанын мәлімдеген еді. Осы істі Ұлытау облысының мамандандырылған аудандық соты қарады. Жергілікті полиция бөлімінің қызметкерлеріне үкім шықты, деп хабарлайды Orda.kz.

Соттың баспасөз қызметінің хабарлауынша, 2024 жылғы 14 тамызда түнде Жаңаарқа аудандық полиция бөлімі ғимаратының әжетханасында үш полицей ер адамды азаптап, әдейі орташа ауырлықтағы дене жарақатын салып, физикалық және психикалық азап келтірген.

«Сотта жәбірленуші мен куәгерлердің айғақтары, сараптама қорытындылары және басқа да заттай дәлелдер арқылы полицейлердің кінәсі дәлелденді» деп жазды соттың баспасөз қызметі.

Үшеуі де ҚР ҚК 146-бабы 3-бөлігінің 1, 3-тармақтары бойынша – «Топтасып жасаған, адам денсаулығына орташа ауырлықтағы зиян келтіре отырып, қатыгез, адамгершілікке жат немесе ар-намысты қорлау, азаптау» бабы бойынша кінәлі деп танылды.

Үкім заңды күшіне енген жоқ.

Айта кетейік, бұған дейін Жезқазғанның №62 мекемесінде сотталушылар көтеріліс жасап, өз-өздеріне дене жарақатын келтірген кезде оларды ауруханаға апарып, бар шуды басуға тырысқан 11 қызметкер «күш қолданды» деген айыппен сотталып кеткен еді.

Еске сала кетсек, Тоқаевқа қарсы қылмыстық іс қозғауға тырысқан Тимур Дәнебаев 2022 жылы ұсталып, 2023 жылы маусымда араздық тудырды деп 3 жылға сотталған болатын. Кейін Атбасар түрмесінде оны түрме қызметкерлері азаптады. Қазір Атбасар қаласында 41 сотталушыны және Тимур Дәнебаевты азаптаған 12 қызметкердің апелляциялық соты өтіп жатыр.