«Тұншықтыра бастадым»: Сәтбаевта қызға шабуылдаған күдікті оқиғаны өзі аузымен айтып берді

Сәтбаевта кіреберісте  қызға шабуылдаған күдікті оқиғаның мән-жайын айтып берді, деп хабарлайды Orda.kz.

Cәтбаев қаласында үйдің кіреберісінде қызға шабуыл жасаған ер адам ұсталды. Бейнебақылау камерасына түсіп қалған оқиға жұрттың жағасын ұстатты.

«Шабуыл жасаған күні ішімдік ішкен едім. Несие төлеуге ақшам жетпей жүрді. Көшеде келе жатып, үйге кіріп бара жатқан қызды көріп, соңынан ердім. Артынша тұншықтырып, сыртқа қарай сүйреп шығармақ болдым. Қызды танымаймын. Ісіме өкінемін», – деді түсініктеме берген күдікті.

Оқиға түнгі сағат екілер шамасында болған. Бейнежазбада қыздың үйге  кіргені, ал оның артынан белгісіз ер адамның есік жабылып үлгермей, жүгіріп кіргені анық көрінеді. Ол қызды қуып жетіп, артынан ұстап алып, баспалдақпен төмен сүйрейді. Қыз сасқалақтамай, айқайлап көмек шақыра бастайды. Дыбысты естіген ер адам тұрғындардың жиналуынан қорқып, үйден тез шығып кетеді.

Айқайды естіген көрші әйел пәтерінен жүгіріп шыққанымен, қаскөй қашып үлгерген. Алайда көп ұзамай күдікті полицейлердің қолына түсті.

Ұлытау облыстық полиция департаментінің бастығы Асқар Дүйсебаевтың айтуынша:

«Сәтбаев қаласында қызға жасалған шабуыл дерегі бойынша қылмыстық іс қозғалды. Жедел іздестіру шаралары барысында күдікті анықталып, ұсталды. Қазіргі уақытта ол уақытша ұстау изоляторына қамалды. Тергеу амалдары жүріп жатыр»,  деп айтылған хабарламада. 

Еске сала кетейік, Ұлытау облысында 22 мамыр күні түнгі сағат 01:55-те ер адам тұрғын үй кіреберісінде қызға шабуыл жасаған еді.