Ақпарат және қоғамдық даму министрі Аида Балаева 29 желтоқсан күні парламент ғимаратында мәжілістің экс-депутаты Бекболат Тілеухан мен журналист Айнұр Коскинаның арасында болған оқиғаға қатысты пікір білдірді.

Министр өз кезегінде журналистика саласының кәсіби этиканы қажет ететінін, десе де бұл жерде сұхбат беруші Бекболат Тілеуханның да эмоциясын ақтауға келмейтінін айтты.

«Әрине, сұхбат берушінің журналистке қатысты эмоциялық әрекетін ақтау қиын (әсіресе журналистің әйел баласы екенін ескерсек). Мәдениетті қарым-қатынас этикасы кез-келген сұхбат барысында сақталуы тиіс. Десе де, мәселенің екінші жағы да бар: ол – журналистің кәсіби білігі мен ішкі мәдениеті» делінген министрдің facebook парақшасындағы жазбада.

Сонымен қатар, министр сұраққа жауап беруші адам жеке өмірін құпия ретінде сақтай алатынын жазған.

«Спикердің жеке өмірінің құпиялығы мен құқығын сақтау, тақырып ауқымындағы сұрақтардан тыс ауытқымау, диалог логикасын нақты ұстану – бұл ешкім жоққа шығармайтын жалпыға ортақ өркениет ережелері. Қалай болғанда да Ақпарат және қоғамдық даму министрлігі журналистердің заңды мүддесін, кәсіби құқығын заң аясында қорғауда қашан да дайын» деп толықырған министр Аида Балаева.

Журналист Айнұр Коскина өз кезегінде жеке басқа қатысты сұрақтардың болмағанын, тек заңға қатысты көп әйел алу туралы сұрақ қойғанын алға тартты.

«Ол (Бекболат Тілеухан – ред.) қалай жауап берсе де өз еркі. Менің нақты қай жерде дұрыс емес екенімді көрсетіңізші» деді журналист министр жазбасына қарата жазылған жауабында.

Не болды?

29 желтоқсан күні мәжіліс депутаты Бекболат Тілеухан қызметтен кететінін мәлімдеді. Отырыстан кейін парламент ғимаратында журналистер экс-депутаттың шешіміне қатысты сұрақтар қойды. Журналист Айнұр Коскина спикерге «Сіз екі әйел алуға қалай қарайсыз?» деп сұрақ қойды. Экс-депутат сұраққа эмоцияналды күйде жауап беріп, лифт ішіне кіріп кетті. Лифт есігі жабылар тұста «менің әйелімде ақың қанша сенің?» деп журналисті итеріп жіберген. Айнұр Коскина оның бұл әрекетінен кейін өзіне тиісілі моноподы сынғанын айтып, парламент залына құзырлы орган өкілдерін шақыртты. Журналист арыз жазып, істің Қылмыстық кодекстің158 бабы (журналистің заңды кәсіби қызметіне кедергі жасау) бойынша қаралуын талап етті.

Бөлісіңіз: