Премьер-министр Ақтөбе облысындағы су тасқыны жағдайын тексерді

Премьер-министр Ақтөбе облысындағы су тасқыны жағдайын тексеріп, қауіпті аймақтағы ауыл тұрғындарын эвакуациялауды жеделдетуді тапсырды.

Бұл туралы Үкімет хабарлайды.

Олжас Бектенов Ақтөбе облысындағы су тасқыны жағдайын тексеріп, президент тапсырмаларының орындалу барысымен жер-жерде танысты.

Су қоймаларының үстінен ұшып, су тасқынынан зардап шеккен үйлерді аралап, ахуалдық орталық жұмысымен танысты, сондай-ақ республикалық штаб отырысын өткізді.

Бектенов су басқан үйлердің жағдайын тексеріп, тұрғындардың тұрғын үйлерді қалпына келтіруге және басқа да қосымша қолдау шараларын көрсетуге қатысты сұрақтарына жауап берді.

Әкімдік тізімдері бойынша су тасқынынан зардап шеккен азаматтардың барлығына несие төлемдерін автоматты түрде 3 айға кейінге қалдыру мүмкіндігі беріледі. Сонымен қатар, кейінге қалдыру кезеңінде төлемдерді кешіктіргені үшін айыппұлдар мен өсімпұлдар есептелмейді.

Жалпы облыста су басу қаупі сақталып отырғаны айтылды. Қазір өзендердің көпшілігінде су тасқыны жоғары. Облыста 792 үй су астында қалды.

Облыста 5 ауданда (Қобда, Мұғалжар, Темір, Әйтеке би, Ойыл) және Ақтөбе қаласында жергілікті ауқымдағы табиғи төтенше жағдай жарияланды.

Оның қорытындысы бойынша Олжас Бектенов су тасқынының салдарын жойғаннан кейін коммуналдық және жеке меншіктегі гидротехникалық құрылыстарда көп факторлы зерттеу жүргізуді тапсырды. Ақтөбе облысында барлығы 206 гидротехникалық құрылыс бар.