Павлодарлық кәсіпкер Ертіске құрылыс қалдықтарын тастады

Павлодарлық кәсіпкер құрылыс қалдықтарын Ертіс өзеніндегі жалға берілген жерге төгіп тастады.

Бұл туралы Orda.kz хабарлады.

Полиция қызметкерлері мен Павлодар қаласының сәулет және қала құрылысы бөлімі тексеріс жүргізді. Анықталғандай, кәсіпкер Ертіс жағасында дүкен салып жатыр. Ол құрылыс қалдықтарын өзенге төгіп, жай ғана қоқыстан құтылмақшы болған.

– Аумақты тазартқан және сол арқылы ортақ орынды ластаған. Қоқысты дұрыс шығармаған осы ұйымның иесіне қатысты, ҚР Әкімшілік кодексінің 505-бабы бойынша хаттама толтырылып, 20 АЕК (58 340 теңге) мөлшерінде әкімшілік айыппұл түріндегі жаза тағайындалды, - деді Павлодар полиция департаментінің теміржол бөлімінің бастығы Арман Каптаев.

Қала әкімдігі хабарлағандай, жеке саудагерде құрылыс-монтаждау жұмыстарының басталғаны туралы талондық хабарлама жоқ. Сондықтан қоршаған ортаға келтірілген зиянды анықтап, әкімшілік жауапкершілікке тарту үшін материалдар экологтар мен жерді бақылау бөліміне тапсырылды.

Кәсіпкердің өзі жақын арада бәрін орнына келтіремін деп уәде берді.

– Біз аумақты жоспарладық және жұмыс кезіндегі сәйкессіздікке байланысты жұмысшылар қоқысты Ертіс жағалауына апарды. Қазіргі уақытта аумақ тазартылуда. Ертістің жайылмасы да тазартылуда, - деді ол.