Олимпиаданың қола жүлде иегері Елдос Сметов Қазақстанға оралды

Бүгін, 27 шілде таңғы 04:20-да Жапониядағы Олимпиада-2020 ойындарында дзюдодан Қазақстан құрамасының қанжығасына алғашқы қола медальді байлаған Елдос Сметов елге оралды.

Елдос Сметовты қарсы алуға Orda.kz тілшілері де барды.

Спортшының жанкүйерлері оны күтіп алуға жарты сағат бұрын жинала бастады.

Сметовты күтіп алуға келушілердің ішінде спортшының ата-анасы мен туысқандары, достары, кәсіпкерлер мен блогерлер, алматылық жанкүйерлер бар.

Сондай-ақ, әуежай маңында алғаш медаль еншілеген спортшыны су жаңа Mercedes-Benz W213 маркалы көлігі күтіп тұрды. Сыйлық Сметовты құрметтеудегі алғашқы марапат.

Бұған дейін ҚР Мәдениет және спорт министрлігі Олимпиада 2020 спорт жарыстарында қазақстанға медаль еншілеген спортшыларды не күтетіні туралы айтқан.

Таңғы сағат 04:20-да қонған ұшақтан, VIP ұшып келу аймағынан араға жарты сағат өткен соң өзін ыстық ықыласпен күткен жанкүйерлері мен жақындарының алдына жүлдегер де шықты.

«Елдос, чемпион!» деп ұрандатқандардың дауысы әуежай ішінде ұзақ жаңғырып, жат жерден мерейі үстем болып оралған Сметовты халқы күтіп алды.

Көлік сыйлаған кәсіпкер ағаларына спортшы өзінің олимпиада ойындарында киген кимоносын сыйға тартты.

- Әзірге алға қойған жоспарым жоқ. Құдай қаласа, тағы да Олимпиада ойындарына қатысып-қатыспайтынымызды уақыт көрсетеді. Ол туралы әзірге ойланған жоқпын, - деді спортшы.

Сондай-ақ, Сметов пандемия кезінде көрермендерсіз өткен сайыс жайлы пікір айтты.

- Пандемияның еш жақсы жағы жоқ. Қанша қиындық болып жатса да, біз жаттығуымызды тоқтатпай, осындай жеңіске жетуге бар күш-жігерімізді салдық.

Зал көрермендерсіз болды. Әдеттегіден әлдеқайда ыңғайсыз екен, - деді Елдос Сметов.

Еске салсақ, Қазақстандық дзюдошы Елдос Сметов 2020 жылғы Олимпиада ойындарында Қазақстанға алғашқы қола медаль әкелді.

Ол нидерландылық Торнике Тсакодемен жекпе-жекке шығып, жеңді. 

Бұған дейін 60 келі салмақта белдескен Елдос Сметов жартылай финалда үш дүркін әлем чемпионы, жапониялық Наохиса Такатомен кездесіп, есе жіберіп алған болатын. 

Ширек финалда Сметов Оңтүстік Корея намысын қорғаған Ким Вон Джунмен жекпе-жекке шықты. Белдесу кезінде спортшы алдымен «ваззари», кейін «иппон» ұпайын қанжығалап, кездесуді мерзімінен бұрын аяқтады.

Бұл оның Олимпиададағы екінші жүлдесі. 2016 жылы Риода өткен Олимпиадада Сметов күміс медаль еншілеген болатын.

Авторлары: Бек Байтас, Жандос Мәдениет

Ықшамдаған: Айнура Дарибаева