Маңғыстау облысында жол апатынан он адам қаза тапты

11 қыркүйекте Маңғыстау облысы Қарақиян ауданы Сенек ауылынан 90 шақырым жерде жол апаты болып, 10 адам қаза тапты, деп хабарлайды Orda.kz.

Облыстық ПД мәліметінше, Toyota Hiace жүргізушісі көлікті басқара алмай қалған. Салдарынан жолаушылар отырған шағын автобус жол жиегінен шығып, аударылып кеткен.

Жүргізуші мен екі жолаушы түрлі жарақаттармен ауруханаға жеткізілді. Полиция қылмыстық іс қозғап, тергеу жүргізіп жатыр. Қажетті сараптамалар тағайындалды.

«11-қыркүйек күні Бекет-ата Шопан-ата тас жолында болған жол көлік оқиғасынан жарақат алған 3 жолаушы Жаңаөзен қалалық көпбейінді ауруханасына жеткізілді. 1964 жылғы туған ер адам және 1967 туған әйел адам жансақтау бөліміне жатқызылды, жағдайлары ауыр. Сонымен қатар, 1960 жылы туған әйел адам аурухананың травматология бөлімінде жатыр, жағдайы тұрақты ауыр. Дәрігерлер қарап бақылап, жағдайларын тексеріп отыр»,   деп хабарлады Маңғыстау денсаулық сақтау басқармасы.