Қопадағы оқушы өлімі: кінәлілер түрмеден босатылды

Ақтөбе облысының Қопа ауылында 9-сынып оқушысы Нұржан Сыдықтың өліміне қатысты сотталғандардың барлығы жазасын бостандықта өтейтін болды. Апелляциялық сатыда үкім жеңілдетіліп, қамауда отырған үш жасөспірім де абақтыдан босатылды, деп хабарлайды Orda.kz.

Ақтөбе облыстық сотының қылмыстық істер жөніндегі сот алқасы кәмелетке толмағандарға қатысты қылмыстық іс үкімін апелляциялық тәртіпте қайта қарады. Іс бойынша барлығы 6 айыпталушы бар, олардың барлығы — жоғары сынып оқушылары. Барлығы 13 адам жәбірленуші деп танылса, соның бірі — 14 жастағы Нұржан Сыдық алған соққыларынан қайтыс болды. Кәмелетке толмағандардың ісі жабық режимде қаралды.

«Б», «Т», «Ж», «Ж-1», «Қ» есімді сотталушылар Қылмыстық кодекстің 293-бабы 2-бөлігінің 1, 3-тармақтары (топ болып бірнеше рет бұзақылық жасау) және 28-баптың 3-бөлігі, 106-баптың 3-бөлігі (қасақана денсаулыққа зиян келтіріп, абайсызда адам өліміне әкеп соғу) бойынша айыпталды. Ал «М» есімді сотталушы ҚК-нің 106-бабы 3-бөлігімен кінәлі деп танылды», – деп хабарлады Ақтөбе облыстық сотының баспасөз қызметі.

Қопа ауылындағы оқушы өліміне қатысты бірінші сатыдағы сот үш оқушыны 6 жыл 8 айға бас бостандығынан айырған болатын. Тағы үш жасөспірім ауыр айып бойынша ақталып, «бұзақылық» бабымен 1 жылға бас бостандығын шектеу жазасына кесілген еді. Сонымен қатар, сотталушылардың бірінің ата-анасына жәбірленуші тарапқа 5 миллион теңге көлемінде моральдық өтемақы төлеу міндеттелді.

Апелляциялық іс жәбірленуші тараптың адвокаттары мен сотталғандардың және олардың заңды өкілдерінің шағымдары негізінде қаралды. Шағым иелері сотталушылардың кәмелетке толмағандығын, кінәсін мойындағанын және жәбірленуші тараппен медиациялық келісімге келгенін ескеріп, жазаны жеңілдетуді сұраған.

Апелляциялық сот үкімді өзгертіп, Қылмыстық кодекстің 63-бабы негізінде сотталғандардың жазасын шартты деп белгіледі. Үкімнің қалған бөлігі өзгеріссіз қалдырылды.

Еске сала кетсек, қайғылы оқиға 2024 жылдың қыркүйегінде Ақтөбе облысының Темір ауданында болған еді. Қопа ауылында жоғары сынып оқушылары 9-сынып балаларын соққыға жыққан. Соның салдарынан бір оқушы алған жарақаттарынан оқиға орнында көз жұмды. Осы жағдайдан кейін мектеп директоры мен аудандық білім бөлімінің басшысы қызметінен кетті. Аудан әкімі мен облыстық білім басқармасының қызметкерлері тәртіптік жазаға тартылды.

Апелляциялық қаулы заңды күшіне енді.

Автор: Ардақ Ерубаева