Иран АҚШ шарттарын қабылдамаса Трамп елді «тозаққа айналдырмақшы»

Ақ үй баспасөз хатшысының айтуынша, АҚШ пен Иран қақтығысты реттеу бойынша «тиімді келіссөздер» жүргізіп жатыр, алайда иран билігі керісінше мәлімдеді. Ислам республикасының сыртқы істер министрі америкалық тараптың ұсынысы  тек «қарастырылып жатқанын» айтты, деп хабарлайды Orda.kz.       

АҚШ президенті Дональд Трамп егер Иран Таяу Шығыстағы қақтығысты реттеу жөніндегі келісімге келіспесе, елде «тозақ орнатуға» дайын екенін сәрсенбі күні Ақ үй арқылы ескертті.

«Егер Иран шындықты қабылдай алмаса, егер ол жеңілгенін түсінбесе және әрі қарай да соғыса берсе, онда президент Трамп оларға бұрын-соңды болмаған күшпен соққы жасауға уәде етті», – деді брифингте баспасөз хатшысы Кэролайн Левитт. 

Левиттің айтуынша, АҚШ пен Иран келіссөздерді жалғастырып жатыр, бұл ретте Иранның мемлекеттік БАҚ-тары Тегеран Вашингтонның соғысты тоқтату жоспарын қабылдамағанын хабарлаған. Сонымен қатар Левит Трамптың сөздері қалжың емес екенін қосты.

«Келіссөздер жалғасуда. Олар нәтижелі», – деді ол, сондай-ақ БАҚ-та жарияланған АҚШ-тың 15 тармақтан тұратын жоспары туралы мәліметтерде «шынайы» екенін атап өтті. 

Өз кезегінде Иранның сыртқы істер министрі АҚШ ұсыныстары қаралып жатқанын, бірақ «делдалдар арқылы хабар алмасу келіссөз жүргізуді білдірмейтінін» айтты. Аббас Арагчи Ислам республикасы «соғысты өз шарттарымен аяқтағысы келетіндіктен», «қарсылықты жалғастыратынын» атап өтті.

25 наурызда Иран парламентінің спикері Мохаммад-Багер Галибаф «елдің арнайы қызметі Иранның жаулары өңірдегі мемлекеттердің бірінің қолдауымен Парсы шығанағындағы иран аралын басып алуға дайындалып жатқаны туралы хабарлады» деді.

«Мұндай жағдайда, «сол елдің барлық өмірлік маңызды инфрақұрылымы үздіксіз шабуылдар нысанасына айналады», – деп ескертті ол. 

Еске салсақ, АҚШ талабымен келіспеген Иран соғысты тоқтатудың 5 шартын атады. Мұндағы ең басты шарт — Ормуз бұғазы бойынша Иранның егемен басқару құқығын халықаралық деңгейде мойындау және оған кепілдік беру. Жергілікті БАҚ мәліметінше, бұл шарт әлі де толықтырылады.

Оқи отырыңыз: 

• Иран бойынша бейбіт келіссөздер 26 наурызда басталуы мүмкін
• Иран Ормуз бұғазы арқылы танкерлерді ақылы өткізе бастады
• Трамп Иранға Ормуз бұғазын ашу үшін 48 сағат уақыт берді, талап орындалмаса шабуыл үдейді