ІІМ басшысы Тұрғымбаевқа қатысты қозғалған қылмыстық іске түсінік берді

Ішкі істер министрі Ержан Сәденов өзіне дейін ведомствоны басқарған Ерлан Тұрғымбаевтың үстінен қозғалған қылмыстық іске қатысты пікір білдірді, деп хабарлайды Orda.kz.

Мәжіліс кулуарында журналистер министрден осыған қатысты егжей-тегжейлі ақпарат беруді өтінді. Сәденов әуелі істің тергеліп жатқанын айтты.

«Тергеуді ішкі істер министрлігі жүргізіп жатқан жоқ, сондықтан қандай іс, қандай бап бойынша екеніне түсінік бере алмаймын. Бұл жерде құзырлы органдар бастама көтеріп, тексеру жүргізіп жатыр, сондықтан сұрақты соларға қойыңыздар», - деді Сәденов.

Алайда, кейін артық айтып қойғанын түсінгендей, тергеуге қатысты сөзінен мүлдем бас тартты.

«Мен растай алмаймын, себебі тағы да айтамын, мұны ішкі істер министрлігі тергеп жатқан жоқ. Ондай ақпарат жоқ», деді ол.