Генерал Новиковтың Алматы тауындағы жерлері мемлекетке қайтарылып жатыр

Алматы қаласы сот алқасы прокуратураның талабын қанағаттандырып, «Халықаралық клубтар қауымдастығы» ЖШС-на тиесілі тау баурайындағы 840 гектар жердің меншік құқығын жарамсыз деп тауып, мемлекетке қайтарды. Жер телімдерінің жалпы құны 54 млрд теңге, деп хабарлайды Orda.kz. 

Прокуратураның мәліметі бойынша, бұл жерлер су қоры санатындағы алқаптың бөлігі. Алайда заңға сәйкес мұндай аумақты жекеменшікке беруге болмайды.

ЖШС құрылтайшыларының қатарында генерал-майор Павел Новиков және «Халықаралық клубтар қауымдастығы» құрып, басқарып отырған қоғамдық қор бар. Компания бұл жерді негізінен ауылшаруашылығы жұмыстары үшін пайдаланған. Мысалы, апорт алмасы және жабайы сиверс алмасын сақтау үшін пайдаланып келген. Фирма өкілдерінің айтуынша, олар коттедж құрылысын бастамаған. Алайда мемлекет жерді тартып ала қалған жағдайда, кейінірек ол элиталы жылжымайтын мүліктің алаңына айналып кетуі мүмкін деп қауіптенетінін жасырмады.

Жерді мемлекет пайдасына қайтару бастамасын бірнеше жыл бұрын мәжіліс депутаты Бақытжан Базарбек көтерді.