Нұр-Сұлтанда 34 жастағы қала тұрғыны екі жасар баладан «Самсунг А-21» маркалы ұялы телефонын тартып алды. Баланың анасы полицияға арыз берді.

Бұл туралы Orda.kz хабарлады.

Елордалық полиция департаментінің хабарлауынша, қыздың анасы қонақ үйде әкімші болып жұмыс істейді.

Тонау болған күні әйел жас баламен жұмыс орнында болған. Ол қызына смартфонын беріп, екінші қабатқа көтерілген. Тонау сәті бейнебақылау камерасына түсіп қалған.

Кадрларға қарағанда, қыз баспалдаққа көтеріліп, түсіп келе жатқан әйелді кездестіреді. Ол баланың қолындағы телефонды көріп, тартып алып, кетіп қалады. Полицейлер жедел-іздестіру шараларын жүргізді.

– Бірнеше сағат ішінде әйел ұсталып, полицияға жеткізілді. Ол бұрын сотталған 34 жастағы қала тұрғыны болып шықты, – деп хабарлады елордалық полиция департаменті.

Күдікті қазірдің өзінде кінәсын мойындап, ұрланған телефон тәркіленіп, иесіне қайтарылды. «Тонау» бабы бойынша сотқа дейінгі тергеу басталды.

Бұл іс-әрекетке 2 мың АЕК (6 миллионға жуық) дейінгі мөлшерде айыппұл салуға не сол мөлшерде түзеу жұмыстарына, 1000 сағатқа дейінгі мерзімге қоғамдық жұмыстарға тартуға немесе мүлкі тәркіленіп немесе 4 жылға дейін бас бостандығынан айрылу жазасы берілуі мүмкін.

Нұр-Сұлтан қаласының полиция департаменті азаматтардан жас балаларды қараусыз қалдырмауды сұрайды.

Бөлісіңіз: