Бос тұрған крематорий: Алматыда 1,5 миллиардқа салынған нысан кімнің қолына өтті?

Алматыдағы жалғыз крематорий әрі 1,5 миллиард теңгеге салынған нысан енді патологоанатомиялық бюроның қарамағына берілді, деп хабарлайды Orda.kz.

2021 жылы мегаполисте бой көтерген бұл нысан енді қалалық патологоанатомиялық бюроның қарамағына өтті.

«Нысан 2025 жылдың 17 қазанында мемлекеттік аудит нәтижесінде Алматы әкіміне баланс ұстаушысын анықтау тапсырмасына сәйкес берілді», деп хабарлады жоғары аудиторлық палата.

Айта кетейік, бұл крематорий 2021 жылы Алматыда 1,5 миллиард теңгеге салынған еді. Алайда әлі күнге дейін пайдалануға берілген жоқ. Қалалық инфрақұрылымның стратегиялық маңызды нысанына айналуы мүмкін бұл нысан денсаулық сақтау министрлігіне де, жергілікті билікке де қажет болмай қалғаны жайлы ақпарат шыққан еді. 

Бұған дейін крематорий уақытша құрылыс басқармасының балансында болған. Енді оның қашан іске қосылатыны барлық нормативтік рәсімдер аяқталған соң белгілі болады.