Баға басылсын, табыс тасысын: Тоқаев Үкіметтің «жүгенін» тартты

Мемлекет басшысы Қасым-Жомарт Тоқаев Премьер-министр Олжас Бектеновті қабылдап, елдің 2025 жылғы әлеуметтік-экономикалық дамуының алдын ала қорытындыларын қарастырды, деп хабарлайды Orda.kz.

Үкімет басшысының баяндауынша ұлттық экономика өсімінің 70 пайыздан астамы өнеркәсіп, сауда және көлік салалары есебінен қамтамасыз етілді.

Статистикалық мәліметтер бойынша биылғы қаңтар мен қараша айлары аралығында көлік қызметтері 20,3 пайызға, құрылыс саласы 14,7 пайызға, ал сауда 8,8 пайызға артқан. Сонымен қатар негізгі капиталға 18,5 триллион теңге инвестиция тартылып, жеке инвестициялар ағыны 9,8 пайызға ұлғайды.

Кездесу барысында 2026-2028 жылдарға арналған макроэкономикалық тұрақтандыру бағдарламасының іске асырылуы талқыланды. Құжат инфляцияны төмендетуге және әлеуметтік әл-ауқатты нығайтуға бағытталған. Бұдан бөлек, премьер-министр жылу беру маусымының барысы мен 2026 жылғы егіс науқанын ерте қаржыландыру жоспары туралы ақпарат берді. Бұл шаралар ауыл шаруашылығы өнімін өңдеу мен экспорт көлемін арттыруға мүмкіндік бермек.

Мемлекет басшысы кездесу қорытындысы бойынша инвестиция тарту, кәсіпкерлікті қолдау және инфрақұрылымды жаңғырту жұмыстарын жандандыруды тапсырды.