БАӘ-де заңсыз мұнай сатқан қазақстандық ұсталып, елге экстрадицияланды

Қазақстанға 300 миллион теңгеге жуық заңсыз мұнай сатты деген күдікке ілінген ер адам Біріккен Араб Әмірліктерінен экстрадицияланды, деп хабарлайды Orda.kz.

Бас прокуратурасының баспасөз қызметі таратқан мәліметке сәйкес, күдікті коммерциялық ұйымның бас директоры қызметін атқара жүріп, 2022–2023 жылдары Ақтөбе облысында сыбайластарымен бірге аса ірі көлемде мұнайды заңсыз өткізген.

Қылмыстан кейін ол шетелге қашып, халықаралық іздеуге жарияланды. 2024 жылы күдіктінің Дубайда жүргені анықталып, Қазақстанның Бас прокуратурасы БАӘ-нің құзыретті органдарына оны ұстап беру туралы сұрау жолдады. Нәтижесінде ер адам ұсталып, елге жеткізілді.

Қазіргі таңда ол тергеу изоляторына қамалды. Мүлкі тәркіленіп, үш жылдан алты жылға дейін бас бостандығынан айырылуы мүмкін.