Атырау облысында тағы да бір ұшқышсыз ұшатын құрылғы құлады

Атырау облысында ұшқышсыз ұшу құрылғысына ұқсайтын белгісіз нысанның құлағаны тіркелді, деп хабарлайды Orda.kz «Ақ Жайық» басылымына сілтеме жасап.

«Ақ Жайық» басылымының мәліметіне қарасақ, құрылғының сынықтары Ресеймен шекараға жақын дала аумағынан табылған. Полиция бұл ақпаратты растады.

«Уәкілетті органдармен бірлесіп, ұшқышсыз ұшатын құрылғының бөлшектеріне ұқсайтын заттың табылуына байланысты тексеру жұмыстары жүргізіліп жатыр. Нысан ашық далада табылды. Зардап шеккендер мен бүлінген нысандар жоқ. Оқиғаның барлық жай-жапсары анықталып жатыр», — деп мәлімдеді полиция өкілдері. 

Бұған дейін де Қазақстан аумағына бірнеше рет дрон сынықтары құлаған болатын. Журналистердің сұрақтарына жауап берген Қорғаныс министрлігінің өкілі бұл аппараттардың Ресейге тиесілі екенін, оларды елдің сынақ полигонында ұшырып, сынақтан өткізетінін айтқан еді.

Еске сала кетсек, Orda.kz тілшісі Батыс Қазақстан облысындағы полигон орнына қатысты материал жазған еді. Бөкей ордасы ауданындағы Капустин Яр полигонында Ресейдің әскери зымыран сынақтары жүргізіліп жергілікті тұрғындар экологиялық және әлеуметтік қиындықтарға тап болып жатыр. Зымыран сынақтарынан соң олардың қалдықтары Бөкей ордасы аумағына құлап, экология мен тұрғындардың денсаулығына әсер етеді.

Бұл әлі өзекті мәселе болған соң, Orda.kz тілшісі сол ауданның тұрғыны, осы мәселені көтеріп жүрген Нағым Тәжімұратовпен жүздесіп, сұхбаттасып қайтқан болатын.