Биылғы 22 қазандағы жағдай бойынша, 15,8 млн га дәнді және дәнді-бұршақты дақылдардың 99,7% жиналды. Орташа өнімділік гектарына 10,2 центнерді құрап, 16,1 млн тонна өнім бастырылды, оның 11,8 млн тоннасы бидай.
Бұл туралы Orda.kz АШМ баспасөз қызметіне сілтеп хабарлады.
Сонымен қатар 1,6 млн тонна майлы дақылдар, 3,8 млн тонна картоп, 4,6 млн тонна көкөніс дақылдары, 2,6 млн тонна бақша дақылдары жиналды.
Негізгі астық егетін өңірлер – Ақмола, Қостанай және Солтүстік Қазақстан облыстарында 11,6 млн га жиналды, бұл олардың жалпы жинау алаңының 100% – ын құрайды. Орташа өнімділік 8,8 центнер болды, яғни 10,1 млн тонна астық бастырылды.
— Егін жинау жұмыстарын уақытылы жүргізу үшін АШТӨ-ге 396,5 мың тонна жеңілдетілген дизель отыны бөлінді. Энергетика министрлігімен бірлесіп, облыс операторларын МӨЗ-ге бекіту кестесі бекітілді. 2021 жылғы 22 қазандағы жағдай бойынша шілде-қазан айларының кестесіндегі 396,5 мың тоннаның 370,1 мың тоннасы (93%) тиелді, – делінген мәлімдемеде.
Республикадағы астық сақтаудың жалпы сыйымдылығы 29,4 млн тонна, оның ішінде астық қабылдау кәсіпорындары 12,8 млн тонна, ауыл шаруашылығы өндірушілері 16,6 млн тонна. 15 қазандағы жағдай бойынша 3,5 млн тонна астық сақтауға жөнелтілді.
Жалпы егін жинау болжанған көлемде. Жиналған дақыл сапасы да жоғары. Ауыл шаруашылығы министрлігінің болжамы бойынша қалған астық қазан айының соңына дейін жиналады.
