Анасының сырқатын сылтауратқан: Ұлытаудың бұрынғы прокуроры үш жарым жылға сотталды

Ұлытау облыстық соты өңірдің бұрынғы прокуроры Самат Каниевке қатысты үкім шығарды, деп хабарлайды Orda.kz.

Тергеу материалдарына сәйкес, Каниев бір азаматқа қылмыстық істі шешуге көмектесемін деп уәде беріп, одан ақша алған. Бұл оқиға 2025 жылдың сәуірінде болған. Демалыста жүрген Каниев өзін қызметтегі прокурормын деп таныстырып, істі «шешіп берем» деп сендірген.

Көрсетілген «қызметтің» құны — 2 миллион теңге. Ақша бірнеше бөліп аударылған. Алайда Каниев уәде еткен көмекті көрсетпеген. Ол 2025 жылдың мамыр айында Қызылорда қаласында ұсталған болатын.

Сот отырысында Каниев кінәсін толық мойындап, мұндай әрекетке баруын қарыздарының көптігімен және анасының ауыр сырқатымен түсіндірді.

Сот оны Қылмыстық кодекстің «Алаяқтық» және «Пара беруге итермелеу» баптары бойынша кінәлі деп таныды. Бұрынғы прокурор жәбірленушіге ақшаны қайтарғанымен, бұл оны жазадан құтқарған жоқ.

Үкімге сәйкес, Самат Каниев үш жарым жылға бас бостандығынан айырылды. Ол өмір бойына мемлекеттік қызметте жұмыс істеу құқығынан, сондай-ақ бірінші дәрежелі заңгер шенінен де айырылды.

Айта кетейік, дәл қазір Атырау облысында «Самұрық-Қазынаның» еншілес компаниясының басшылығына қатысты ірі көлемдегі пара мен ұрлық деректері бойынша қылмыстық іс қаралып жатыр.