Алматыдағы су айдындары дрон көмегімен бақыланады

Адамдардың суға батуын алдын алу үшін қаланың су қоймаларын дрондар бақылап отырады.

Бұл туралы Orda.kz хабарлады.

Алматыда өткен брифинг барысында Төтенше жағдайлар департаменті бастығының орынбасары Ерлан Әлібеков алдын алу шараларына қарамастан, шомылу маусымы басталғаннан бері суда екі адам қайтыс болғанын айтты.

Бірінші жағдай 31 мамырда Сайран көлінде орын алған. Ер адам, шамасы, мас күйінде суға шомылуға тыйым салатын белгінің жанында суға түскен. Оның денесі келесі күні табылды.

Екінші оқиға өткен аптаның соңында дәл сол Сайран көлінде болды. Психикалық денсаулық орталығында есепте тұрған Алматы облысының 43 жастағы тұрғыны қалтқылардың артына шомылғаннан кейін суға батып кетті. Куәгерлердің айтуынша ол мас болған.

Ерлан Әлібеков көлдегі кезекшілік күшейтілгенін, енді демалыс кезінде департаменттің жеті қызметкері сол жерді бақылауда ұстайтындығын хабарлады. Көл жағалауында Әуезов және Алмалы аудандарының тәртіп сақшылары да күн сайын кезекшілік етеді.

– Сонымен қатар, қазіргі уақытта біз дрон көмегімен мониторинг жүргізуді жоспарлап отырмыз. Патрульдеу тек қайықпен емес, дрон көмегімен де болады, - деді Алматы қаласы Төтенше жағдайлар департаменті бастығының орынбасары.

Қайда суға түсуге болады?

Алматыда жүзуге төрт жерде рұқсат етіледі:

• Сайран көлі – Төле би көшесінен оңтүстікке қарай 200 метр - Алмалы ауданы;
• Сайран көлі – Төле би көшесінен пирске дейінгі оңтүстікке қарай 300 метр - Әуезов ауданы;
• Қонаев атындағы Үлкен Алматы каналы – Баума тоғайы - Түрксіб ауданы;
• Қонаев атындағы Үлкен Алматы каналы – Гүлдер демалыс аймағы - Жетісу ауданы.

Сайран көлінің рұқсат етілген жерлерінде қалқымалар шығыс және батыс жағынан созылып жатыр.