Ақтөбеде 14 жастағы Нұржан Сыдықтың өліміне күдікті болған үш оқушы ақталды

Ақтөбе облысы Темір ауданы Қопа ауылында буллинг құрбаны болған 14 жастағы Нұржан Сыдықтың өліміне қатысты сот үкімі шықты, деп хабарлайды Orda.kz.

Оқушы өліміне күдікті ретінде қамалғандардың үшеуі ақталып, бостандыққа шықты, ал тағы үшеуі кінәлі деп танылып, абақтыға жіберілді.

Іс Ақтөбе облысының кәмелетке толмағандар істері жөніндегі мамандандырылған ауданаралық сотында жабық режимде қаралды. Сотталғандардың екеуі 10-сынып оқушысы, төртеуі 11-сынып оқушысы.

Тергеу ҚР Қылмыстық кодексінің:

• 106-бабы 3-бөлігі («Денсаулыққа қасақана ауыр зиян келтіру, абайсызда өлімге әкеп соққан»);
• 293-бабы 2-бөлігі («Бұзақылық»);
• 28-бабы 3-бөлігі («Қылмысты ұйымдастыру») бойынша жүргізілді.

Оқиға кезінде жоғары сынып оқушылары 9-сынып оқушыларын ұрған. Нәтижесінде 12 оқушы жәбірленуші деп танылды.

ҚК 293-бабы 2-бөлігі 1,3-тармақтарымен кінәлі деп танылған Қ.Қ., Е.Ж. және Ж.Е.-ге қатысты 1 жылға бас бостандығынан шектеу жазасы тағайындалды. Оларға қатысты 106-бабы 3-бөлігі бойынша қылмыстық құқықбұзушылық дәлелденбегендіктен ақтау үкімі шықты.

Судья 106-бабы 3-бөлігі бойынша айыпталған Н.Б., Е.Т. және Н.Ж. сотталушыларға 6 жыл 8 айға бас бостандығынан айыру жазасын тағайындады.

Сонымен қатар, сот Ақтөбе облысының білім басқармасына жеке қаулы шығарды. Сондай-ақ, Ақтөбе облыстық полиция департаментінің бастығына іс бойынша анықталған заңбұзушылық фактілеріне назар аудару туралы жеке қаулы берілді.

«Азаматтық талап қоюшы Раушанның азаматтық талабы ішінара қанағаттандырылсын. Кәмелетке толмаған Е.Т.-ның заңды өкілінен Раушанның пайдасына 5 млн теңге моральдық шығын өндірілсін. Н.Б., Е.Т., Ж.М., Е.Ж., Қ.Қ., Е.Ж. заңды өкілдерінен Раушанға үлестік тәртіпте 2 млн теңге шығын өндірілсін», – деді судья.

Еске сала кетейік, оқиға 2024 жылғы 2 қыркүйекте болды. Марқұм Нұржан Сыдық 15 жасқа толуына бір ай қалғанда қаза тапты.

Жәбірленуші тарап үкіммен келісті. Сотқа қатысқан марқұмның анасы жылап қалды және пікір білдіруден бас тартты. Ақталып шыққан жәбірленушілердің туыстары да жылап, апелляциялық шағым түсірмейтінін айтты.

Оқиғадан кейін Ақтөбе облыстық білім басқармасы арнайы жұмыс тобын құрды. ҚР Бала құқықтары жөніндегі уәкіл Динара Зәкиева Қопа ауылына барып, оқушылар арасында сауалнама жүргізді. Мектептерге полиция қызметкерлері бекітілді.

Бұл оқиға мектептердегі буллинг мәселесіне қатысты жүйелі бақылаудың қажеттігін көрсетті. Білім беру ұйымдарында қауіпсіз орта қалыптастыру бағытындағы шаралар жүріп жатыр.

Автор: Ардақ Ерубаева