Ақмола денсаулық сақтау басқармасының экс-басшысы қамауға алынды

Ақмола облысы денсаулық сақтау басқармасының бұрынғы басшысы Сүлен Ілиясов бөтеннің мүлкін жымқырды деген күдікке ілінді.

Бұл туралы Orda.kz хабарлады.

Көкшетау тергеу сотының қаулысымен Сүлен Ілиясовқа қатысты екі ай мерзімге қамауға алу түріндегі бұлтартпау шарасы қабылданды.

Облыстың бұрынғы бас дәрігері Қылмыстық кодекстің 189-бабы 4-бөлімінің 2-тармағы бойынша қылмыстық құқық бұзушылық жасады деп күдіктелуде.

Ақмола облыстық сотының баспасөз қызметінде атап өткендей, бұл ауыр сыбайлас жемқорлық қылмыстар санатына жатады. Онда 10 жылдан астам мерзімге бас бостандығынан айыру жазасы қарастырылған.

Ілиясов пандемия таралуының ең қиын кезеңінде жұмыс істегендіктен, екі ай бұрын өз еркімен қызметінен кетті. Енді ол үкімге қарсы Ақмола облыстық сотына шағым түсірмекші.