Ұшақ апаты: Siemens компаниясының басшысы отбасымен бірге қаза тапты

Нью-Йоркте тікұшақ Гудзон өзеніне құлап, алты адам қаза тапты, деп хабарлайды Orda.kz. 

Нью-Йоркте Гудзон өзеніне құлаған тікұшақ апатынан Siemens компаниясының Испаниядағы бөлімшесінің басшысы Агустин Эскобар мен оның отбасы мерт болды. 

Оқиға оншақты куәгердің көз алдында болған. Әуеде келе жатқан тікұшақ кенеттен теңселіп, өзенге құлап кеткен. Апат себебі әзірге белгісіз. Қаза болғандардың үшеуі – бала. Тікұшақ бортында ұшқыштан бөлек, Испаниядан барған туристер отбасымен бірге болған. 

Құтқарушылар бірден көмекке ұмтылғанымен, ешкімді аман алып қалу мүмкін болмады. Тікұшақтың ұшқышы да апат салдарынан қаза тапты.

Дональд Трамп қаза тапқандардың жақындарына көңіл айтты. Көлік министрі Шон Даффи және оның командасы апат себептерін анықтау үшін жұмыс істеп жатыр.

Айта кетейік, Ақтаудағы Azerbaijan Airlines компаниясына тиесілі ұшақ апаты 2024 жылдың ең қайғылы әуе апаттарының бірі болды. 25 желтоқсанда Azerbaijan Airlines әуе компаниясының ұшағы құлаған кезде 38 адам, оның ішінде 6 Қазақстан азаматы қаза тапты.