Шымкенттегі 128 миллион теңгеге сатылған Мұз сарайы мемлекет меншігіне қайтарылды

Шымкент қаласының әкімі Ғабит Сыздықбеков «Мұз сарайы» мемлекет меншігіне қайтарылғанын мәлімдеді, деп хабарлайды Orda.kz  

Бұл туралы ол Instagram желісінде жазды.

«Мұз сарайы тағдырына алаңдаушылық білдіргендердің көпшілігі мегаполис тұрғындары мен қонақтары. Қысқы спорт түрлерімен шұғылданатын жалғыз орынды қалалық прокуратура тексеріп, бірқатар заң бұзушылық анықтады. Мемлекеттік мүддеге қайшы ұйымдастырылған аукцион барысында анықталған бұзушылықтар туралы Қадағалау органы Шымкент қаласының мамандандырылған ауданаралық экономикалық сотына мемлекет үлесін сатып алу туралы келісімді жарамсыз деп тану туралы талап арыз жолдады» деп жазды  Ғабит Сыздықбеков. 

Ол сот шешімімен қалалық прокуратураның талап арызы қанағаттандырылғанын түсіндірді. Сонымен, ақыры  «Мұз сарайы» мемлекет меншігіне қайтарылды. Сондай-ақ, Шымкент басшысы қала әкімдігі бірқатар нысандарды мемлекет меншігіне қайтару бойынша жұмыс жүргізіп жатқанын еске салды. 

«Жеті жыл бұрын ол «Мұнай Құрылыс Сервис» ЖШС меншігіне 128 миллион теңгеге сатылған, сол кезде нысанның сметалық құны 996 миллион теңге болған, жеңімпазбен келісім шарт жасалған, бірақ келісімде нысанның қызметі туралы талаптардың сақталуы көрсетілмеген» деп атап өтті әкім өз жазбасында.