Кәріз суын көлге төгетін Rixos Water World Aktau танымал қонақ үйлер қатарында

Kazakh Tourism Қазақстандағы қонақ үйлердің туристер арасында танымалдығы бойынша рейтинг жариялады, деп хабарлайды  Orda.kz.

Kazakh Tourism Қазақстандағы қонақ үйлердің туристер арасында танымалдығы бойынша рейтинг жариялады. Бірінші және екінші орындарды Алматы қаласындағы «Қазақстан» және Holiday Inn қонақ үйлері иеленді. Үшінші орынға астаналық Sheraton Nur-Sultan Hotel орналасты.

Мегаполистерден тыс рейтингте жалғыз -  Маңғыстау облысындағы Rixos Water World Aktau қонақ үйі  болды. Ол төртінші орынға ие болды. Kazakh Tourism деректері бойынша, өткен жылы бұл қонақ үйде 14,5 мың шетелдік қонақ болған.

Өткен жылдың басында Rixos Water World Aktau қонақ үйі орталық кәріз жүйесіне қосылмағандықтан Қарақол көлінің суына лас қалдықтар шығарғаны белгілі болды. Бұл жағдай су қоймасында 800-ден астам аққудың қырылуынан кейін анықталды.

Аққулардың жаппай қырылуынан кейін Ақтаудағы Rixos қонақ үйіне қатысты іс қозғалды. Нәтижесінде қонақ үй үш миллион теңге айыппұл салынып, бұзушылықтарды түзетуге міндеттелді.