Биыл елімізде 1 мыңға жуық есірткі таратқыш бостандыққа шықты

 2025 жылы Қазақстанда 1 мыңға жуық есірткі таратушы бостандыққа шықты, деп хабарлады ішкі істер министрлігі есірткі қылмысына қарсы іс-қимыл комитеті төрағасының орынбасары Қуандық Әлжанов.

«Біз бұны талдадық. Бүкіл әлемде есірткі қылмыстары бойынша ең қатаң жазалау шаралары - есірткі таратқаны үшін беріледі. Кейбір елдерде өлім жазасына дейін барады. Бірақ, бізде он бес-он алты жастағы, кәмелетке толмаған, көбінесе алғаш рет қылмыс жасаған жастар тартылғандықтан, мемлекет оларға ертерек бостандыққа шығып, жаңа өмір сүруге мүмкіндік берді. Заңға қол қойылды. Биыл 1 мыңға жуық адам бас бостандығынан айыру орындарынан босатылды», - деді Қуандық Әлжанов. 

Оның айтуынша, қазір құқық қорғау органдары әлеуметтік оңалту, құқықтық, медициналық, әлеуметтік көмек көрсетуді ұйымдастыруда.

«Бізде сатқындар мен форма киген қылмыскерлер де бар, оларға қатысты жаза өмір бойы бас бостандығынан айыруға дейін қатайтылды», - деп қосты Әлжанов. 

Жақында еліміздегі есірткі жеткізетін халықаралық арнаның күдікті ұйымдастырушысы тұтқындалды.

Биылғы жылдың тамыз айында Шығыс Қазақстан облысында ұлттық қауіпсіздік комитеті прокуратура органдарының үйлестіруімен есірткі зертханасы жойылды. 

Қарағанды облысында есірткі заттарын бір аптадан кейін де анықтай алатын жоғары дәлдіктегі құрылғы — газдық хроматограф қолданысқа енгізілді. 

18-20 жас шамасындағы жастар темір торға тоғытылған. Сұрастыра келе мұндай іске баруға басты себеп ретінде материалдық қиындықтар түрткі болғанын айтты. Көбі жұмысқа кірген сәтте-ақ бір сағат та жұмыс істемей жатып полицияның құрығына ілініп, 10 жылға сотталып кеткендер.