Балқаш көлінде су деңгейі артып келеді

Жыл басынан бері Қапшағай су қоймасынан Іле өзені арқылы Балқаш көліне 13,5 миллиард текше метр су жіберілген, деп хабарлайды Orda.kz. 

Бұл туралы Қазақстанның Су ресурстары және ирригация министрлігі мәлімдеді. 

Жіберілген су нәтижесінде көлдегі судың орташа деңгейі Балтық жүйесі бойынша 341,60 метрге жеткен. Балқаштағы судың 70 пайызға жуығы трансшекаралық Іле өзені есебінен екені атап өтілді. Биыл Қытаймен шекарадағы «Добын» өлшеу станциясында орташа су шығыны секундына 384 текше метр болып, былтырғымен салыстырғанда 17 пайызға артқан.

Министрлік Қазақстан мен Қытай арасындағы Трансшекаралық өзендерді бөлу жөніндегі үкіметаралық келісім жобасын әзірлеп жатыр. Құжаттың негізгі мақсаты - Балқаш көлін оңтайлы деңгейде ұстап тұруға мүмкіндік беретін су көлемінің толуын қамтамасыз ету. Ведомство басшысы Нұржан Нұржігітовтің айтуынша, Қытай, Ресей және Орталық Азия елдерімен трансшекаралық өзендер бойынша 28 кездесу өткізілген.